Opnunarsýning 2008

Aðalbjörg Sigurðardóttir húsfreyja í Húsey og stjúpdóttir hennar Ingibjörg Halldórsdóttir, síðar húsfreyja á Galtastöðum. Ingibjörg klæðist skautbúningi sem hún saumaði. Kirtillinn er varðveittur í Minjasafni Austurlands. Myndin mun vera tekin árið 1915. Gefandi myndar: Þórey Sigmundsdóttir.

Heimilisfólk á Bragðavöllum í Hamarsfirði. Frá vinstri: Jón Sigfússon, bóndi, Helga Árnadóttir, ráðskona og bræðurnir Guðjón og Sigfús Jónssynir. Upplýsingar vantar um gefanda og tökuár myndar.

Fjallagarpurinn Brynhildur Stefánsdóttir, ljósmóðir frá Merki á Jökuldal, við matseld í Grágæsadal. Myndin er eftirtaka eftir mynd, í eigu Jóhanns Stefánssonar, sem tekin er í kringum 1970.

Þuríður Gunnarsdóttir og Páll Sveinsson, ábúendur í Breiðuvík (síðar í Geitavík) með þremur elstu börnum sínum: Daníel, Þorbjörgu og Sigrúnu. Gefandi myndar er Sigurður Ó. Pálsson yngri sonur hjónanna, en hann var ekki fæddur þegar myndin var tekin seint á þriðja áratug síðustu aldar.

Gestir Gríms Laxdal, verslunarstjóra á Vopnafirði, að koma frá krokketleik. Myndin er tekin árið 1897 eða 1898. Frá vinstri: Grímur Laxdal, Guðrún Pétursdóttir, Ólafur Methúsalemsson, Kjartan Jónsson, Friðrikka Valdimarsdóttir, Jón Jónsson læknir, Margrét K. Jónsdóttir.Í glugga til hægri: Guðrún Laxdal, móðir Gríms, og Sveinbjörg eiginkona hans. Fólkið í glugganum til vinstri er óþekkt. Myndin kom til ljósmyndasafnsins frá Safnastofnun Austurlands.

Gamli hafnargarðurinn á Borgarfirði eystri. Myndin tilheyrir ljósmyndasafni Vikublaðsins Austra og var tekin af Birni Aðalsteinssyni í kringum 1980.

Frá afhendingu bókasafns Önnu Guðnýjar Guðmundsdóttur og Halldórs Ásgrímssonar til Héraðsskjalasafns Austfirðinga vorið 1976. Á myndinni eru synir þeirra hjóna. Frá vinstri: Árni, Ingi, Guðmundur, Ásgrímur og Halldór.

Hallfríður Björnsdóttir frá Engilæk og tengdasonur hennar, Jón Ágúst Ármannsson bóndi á Hrærekslæk. Þess má til gamans geta að Hallfríður (f. 1881 – d. 1969) var fjórum árum yngri en Jón Ágúst (f. 1877 – d. 1951). Í baksýn er Hrærekslækjarbærinn en myndin mun vera tekin árið 1947 eða 1948 af Birni Jónssyni. Ágústa Jónsdóttir gaf eftirtöku til safnsins.

“Húrra krakki„ leiksýning sett upp af Eiðanemum veturinn 1936. Leikendur (frá vinstri): Kristján frá Djúpalæk, Margrét Eiríksdóttir, Ólína Jónsdóttir, Guðlaug Gísladóttir, Jóhann Jónsson og Þórarinn Þórarinsson, kennari, sem bæði mun hafa leikstýrt og farið með hlutverk í verkinu. Ljósmynd: Sveinn Guðnason. Myndin kom til safnsins í ljósmyndasafni frá Eiðum.

Jónas Pétursson, síðar alþingismaður, og Sveinn Þórarinsson, verkfræðingur frá Eiðum, ásamt vænum verðlauna bekrum. Myndin er úr myndasafni Jónasar og var tekin á tilraunabúinu á Skriðuklaustri sem Jónas veitti forstöðu um árabil. Myndin var tekin um miðjan fimmta áratug síðustu aldar. Gefendur: börn Jónasar.

Mynd án upplýsinga, komin frá Sigurði Sigurðssyni kennara á Seyðisfirði sem er fjórði maður í fremstu röð, talið frá vinstri. Líkur eru á að hér séu á ferðinni nemendur Möðruvallaskóla, en um það verður þó ekki fullyrt. Þriðji maður frá vinstri í næst efstu röð virðist ekki vera af þessum heimi og minnir útlitið óneitanlega á þær lýsingar sem þjóðtrúin gefur okkur af svokölluðum mórum.

Bílafloti Kaupfélags Héraðsbúa í lok sjötta áratugar 20. aldar. Myndina tók Kristján Ólason, klæðskeri á Reyðarfirði, í tilefni af ritun bókar um sögu félagsins sem gefin var út í tilefni af 50 ára afmæli þess. Myndin er eftirtaka af mynd í eigu Magnúsar Kristjánssonar.

Þorsteinn Valdimarsson, skáld, við orgelið í Möðrudalskirkju. Við hlið hans stendur Jón A. Stefánsson bóndi. Auk þess að vera ljóðskáld samdi Þorsteinn lög. Myndina tók Gunnar Guttormsson. Gefandi: Sigurður Blöndal.

Systurnar Guðríður Guðmundsdóttir (til vinstri) (f. 1903- d. 1982) og Magnea Ingibjörg Guðmundsdóttir (f. 1900- d. 1988). Þær ólu mestan sinn aldur í Norðfirði en báðar voru þær fæddar á Fljótsdalshéraði. Myndin er líklega tekin snemma á áttunda áratug 20. aldar. Gefandi: Bjarghildur Sigurðardóttir.

Tveir drengir á bryggju í Neskaupstað. Myndina tók Tómas Zoëga, líklega á fjórða áratug síðustu aldar. Sonarsonur Tómasar, Jóhann Zoëga, færði safninu eftirtökur af myndum hans til varðveislu.

Vigfús Helgason, hákarlaverkandi á Borgarfirði eystri, nýkominn úr fengsælli veiðiferð. Myndina er úr myndasafni Vikublaðsins Austra. Hana tók Marinó Marinósson um miðjan níunda áratug 20. aldar.

Þórunn Pálsdóttir, fyrri kona Páls Ólafssonar skálds og alþingismanns. Myndin er eftirtaka, gerð á Ljósmyndastofu Eyjólfs Jónssonar á Seyðisfirði. Þórunn andaðist árið 1880 og telur Inga Lára Baldvinsdóttir, ljósmyndasérfræðingur í Þjóðminjasafninu, að danskur ljósmyndari að nafni Johan Holm Hansen hafi tekið myndina annað hvort árið 1866 eða 1867. Er hún því með elstu myndum í eigu safnsins.

Þrír ungir drengir á Seyðisfirði um miðja 20. öld . Frá vinstri: Jóhann Sveinbjörnsson, Sveinn Sigmarsson og Ingvi Svavarsson. Ljósmyndina tók Vilbergur Sveinbjörnsson og lánaði hana safninu til eftirtöku. Sólveig Sigurðardóttir veitti upplýsingar um nöfn drengjanna.

Guðlaug Stefánsdóttir við afgreiðslu í matvörubúð Kaupfélags Héraðsbúa árið 1961. Ljósmyndari og gefandi myndar: Guðmundur R. Jóhannesson.

Mynd úr myndasafni Páls Guttormssonar á Hallormsstað. Ekki hafa verið borin kennsl á fólkið en líklega eru þetta sumarstarfsmenn Skógræktar ríkisins einhvern tíma á sjötta eða sjöunda áratug 20. aldar.