Starfsfólk  |  EN  |  ISL  |    |  

Ljósmyndasafn Austurlands

Ljósmyndasafn Austurlands er sérstök deild innan Héraðsskjalasafns Austfirðinga og rekið með framlagi frá Sambandi sveitarfélaga á Austurlandi, Minjasafni Austurlands og Héraðsskjalasafni Austfirðinga. 

Í elsta hluta ljósmyndasafnsins eru um 14 þúsund kópíur og eru margar þeirra komnar til ára sinna. Margt er þar forvitnilegra mynda frá ýmsum tímum og stöðum, bæði mannamyndir og hópmyndir en einnig myndir af húsum, náttúru, menningu, skólastarfi og atvinnulífi.

Myndirnar eru flestar komnar til safnsins frá einstaklingum, jafnvel úr dánarbúum, eða í gegnum Minjasafn Austurlands sem afhendir Ljósmyndasafninu myndir sem þangað berast með öðrum gripum. Ljósmyndasafninu hafa einnig áskotnast nýrri söfn. Stærst þeirra er ljósmyndasafn (kópíu- og filmusafn) Vikublaðsins Austra sem var afhent árið 2004 og telur rúmlega 26 þúsund skannaðar og tölvuskráðar myndir. Þær myndir eru að mestu leyti teknar á níunda og tíunda áratug síðustu aldar og endurspegla vel mannlíf í fjórðungnum á sínum tíma.

Árið 2012 fékk safnið afhent ljósmynda- og filmusafn Ungmenna- og íþróttasamband Austurlands (UÍA). Um er að ræða rúmlega 10 þúsund myndir sem er búið að skanna og skráning þess er langt komin. Einnig má nefna ljósmyndir Sigurðar Aðalsteinssonar blaðamanns og leiðsögumenns sem spanna frá miðbiki 20. aldar til síðustu aldamóta.

Sífellt berst meira myndefni til Ljósmyndasafnsins, bæði á pappír og á stafrænu formi. Frá árinu 2011 hefur Héraðsskjalasafnið verið í átaksverkefni um skönnun og tölvuskráningu mynda. Í lok árs 2013 var búið að skanna rúmlega 58 þúsund myndir og skrá 52 þúsund þeirra í FotoStation myndakerfið. Elstu mannamyndirnar í eigu Ljósmyndasafns Austurlands, sem eru rúmlega 13 þúsund talsins, eru skráðar í FileMaker gagnagrunn. Skönnun og skráning þeirra í FotoStation hófst á árinu 2014 en í því safni eru meðal annars myndir í visit- og kabinetstærð.

Ljósmyndavefur

Héraðsskjalasafnið heldur úti ljósmyndavef á slóðinni myndir.heraust.is.
Sjá nánari upplýsingar um ljósmyndavefinn.

Gjaldskrá

Hægt er að kaupa afrit af myndum til einkanota eða fyrir útgáfu.
Sjá nánari upplýsingar í gjaldskrá.

Héraðsskjalasafn AustfirðingaLaufskógum 1, 700 Egilsstaðir

Sími: 471 1417
Tölvupóstur:   heraust@heraust.is

Senda fyrirspurn

 

 

Héraðsskjalasafn Austfirðinga er byggðasamlag á vegum sveitarfélaga á Austurlandi. Safnið starfar samkvæmt lögum um opinber skjalasöfn frá árinu 2014 og er sjálfstæð skjalavörslustofnun en lítur faglegu eftirliti Þjóðskjalasafns Íslands. Megin hlutverk safnsins er að taka við skjölum og hafa eftirlit með skjalavörslu aðildarsveitarfélaga sinna og stofnana á þeirra vegum. Í safninu er ágæt aðstaða fyrir fræðiiðkanir. Öll söfnin í héraðsskjalasafninu - skjalasafnið, ljósmyndasafnið og bókasafnið - stækka ört og luma á margvíslegu efni sem nýst getur við fjölbreyttar rannsóknir, hvort sem þær eru unnar af fræðimönnum, nemum eða öðrum sem kjósa að nýta sér safnkostinn. Margs konar gögn eru í skjalasafninu, þar má t.d. leita upplýsinga um örnefni, landamerki eða um starfsemi félaga sem afhent hafa safninu skjöl sín.

© 2017 Héraðsskjalasafn Austfirðinga