Starfsfólk  |  EN  |  ISL  |    |  

Í tilefni jólahátíðarinnar höfum við sett jólakortasýninguna inn á vefinn og má finna hana undir flipanum "Myndir" hér efst á síðunni. Kortin eru frá ýmsum tímum en stærstur hluti þeirra er úr safni systkinanna á Höfða á Völlum en einnig eru mörg úr safni Kristínar Gunnlaugsdóttur og Ólafs Stefánssonar. Jafnframt er kominn inn á síðuna fróðlegur pistill um jólakort sem Arndís Þorvaldsdóttir hefur tekið saman. Aðalfundur fulltrúaráðs Héraðsskjalasafns Austfirðinga var haldinn á Breiðdalsvík 9. desember sl. og er fundargerð þess fundar nú aðgengileg hér á vefnum. 

Þá eru afstaðnir tveir helstu viðburðirnir í safnahúsinu á aðventunni, bókavakan og jólagleðin. 
Síðastliðið fimmtudagskvöld (4. desember) var bókvaka haldin í safnahúsinu og var hún vel sótt. Um 40 manns mættu og hlýddu á upplestur úr fimm bókum og umfjallanir um rúman tug bóka annarra bóka. Rannveig Þórhallsdóttir, Hálfdán Haraldsson og Ingunn Snædal lásu úr verkum sínum, auk þess sem Smári Geirsson las úr bókinni Þræðir - Hrafnkell A. Jónsson foringi og fræðimaður, en Smári er annar tveggja ritstjóra þeirrar bókar. 

Fyrstu vikuna í desember verður mikið um að vera í safnahúsinu. Hin árlega jólaskemmtun safnahússins verður haldin sunnudaginn 7. desember og hefst hún kl. 13. Þremur dögum áður, fimmtudagskvöldið 4. desember, verður bókavaka safnahússins, en ákveðið var að endurreisa þann viðburð eftir hlé. Bókavakan hefst kl. 20. Nánar má fræðast um báða þessa viðburði með því að smella á fyrirsögn þessarar tilkynningar.

Þá er komin ný myndasýning inn á vef héraðsskjalasafnsins, en nokkuð er um liðið síðan síðast var sett inn sýning. Nýja sýningin ber yfirskriftina Sjómennska og samkomur og eru í henni myndir sem spanna tímabilið frá upphafi til loka 20. aldar. Myndefnin í sýningunni eru þó mun margvíslegri en yfirskriftin gefur til kynna því hugtakið "samkomur" er hér notað í mjög víðum skilningi auk þess sem inn á milli eru myndir sem hvorki eru teknar af sjómennsku né samkomum. Töluvert er af óþekktu fólki á myndunum og eru ábendingar vel þegnar um hverjir þarna eru. Ábendingum er hægt að koma á framfæri á netfangið This email address is being protected from spambots. You need JavaScript enabled to view it. eða í síma 471 1417. 

Í nýliðnum októbermánuði sóttu fleiri gestir héraðsskjalasafnið heim en í nokkrum öðrum mánuði það sem af er ári. Alls komu 272 gestir í safnið á opnunartíma í október sem er tæpum 70 gestum fleira en heimsóttu safnið í febrúar, sem er var fram til þessa eini mánuður ársins þar sem gestafjöldi fór yfir 200 manns. Meginskýringin á fjölda gesta í október er sú að óvenjumikið var um heimsóknir skólahópa í safnið, en um helmingur gesta þennan mánuð komu á þeim forsendum. Er þessi aukning skólaheimsókna afar ánægjuleg og mikilvægur liður í að vekja athygli á starfsemi safnsins. Sé bætti við aðsóknartölur októbermánaðar þeim hóp sem sótti minningardagskrá um Stein Steinarr, sem flutt var sunnudagskvöldið 12. október, fer gestafjöld októbermánaðar fast að 300 manns. Alls sóttu 1486 gestir héraðsskjalasafnið heim á fyrsti 10 mánuðum ársins. 

Síðastliðinn þriðjudag, 28. október, var haldinn fundur í stjórn Héraðsskjalasafns Austfirðinga. Átti fundurinn upphaflega að vera fimmtudaginn 23. október en var þá frestað sökum slæms veðurútlits. Aðalefni fundarins voru drög að fjárhagsáætlun ársins 2009. Ljóst er að sú óvissa sem er nú í efnahagslífi landsins gerir fjárhagsáætlunargerðina mun erfiðari en ella. Almennt má segja að í þeim drögum af fjárhagsáætlun sem nú er í vinnslu sé gætt aðhalds í rekstri safnsins án þess að ráðist sé í stórfelldan niðurskurð. 
---
Dagar myrkurs hefjast í næstu viku og standa frá 10.-16. nóvember. Að vanda taka söfnin í safnahúsinu þátt í Dögum myrkurs.

Sunnudagskvöldið 12. október sl. stóð héraðsskjalasafnið að dagskrá um ævi og kveðskap ljóðskáldsins Steins Steinarr, en þann 13. október voru 100 ár liðin frá fæðingu hans. Dagskráin nefndist "Steinn yfir Steini" og byggðist að miklu leyti upp á ljóðum Steins en þó var einnig stiklað á stóru í lífshlaupi hans og sagðar af honum sögur. Hrafnkell Lárusson hafði með höndum skipulagningu kvöldsins. Hann naut við það góðrar aðstoðar annarra starfsmanna safnahússins. Við flutning dagskrárinnar fékk Hrafnkell sér til fulltingis jökuldælsku skáldkonuna og kennarann Ingunni Snædal. Aðstandendur voru ánægðir með hvernig til tókst og einnig var aðsóknin með ágætum en hátt í 30 manns mættu.

 

Um miðjan nýliðinn mánuð lagðist forstöðumaður héraðsskjalasafnsins í ferðalag á vegum stofnunarinnar í þeim tilgangi að hitta annað safnafólk. Annars vegar var um að ræða fund skjalavarða sem haldinn var í Stykkishólmi og hins vegar árlegan safnaskóla Félags íslenskra safna og safnmanna sem í ár var haldinn á Ísafirði. Er meiningin að gera hér stuttlega grein fyrir því sem fram fór á báðum stöðum. 

Starfsemi héraðsskjalasafnsins er nú óðum að færast meira í hausthaminn eins og tíminn getur tilefni til. Nú hafa skólar verið settir og þá fer skólafólk að verða áberandi meðal gesta safnsins og er það vel. En haustinu fylgir fleira þ.á m. fundir og ráðstefnur. Í næstu viku mun forstöðumaður héraðsskjalasafnsins sækja skjalavarðaþing í Stykkishólmi sem og safnaskóla FÍSOS sem nú er haldinn á Ísafirði.

Hulda Sigurdís Þráinsdóttir var nýlega ráðin í hlutastarf hjá héraðsskjalasafninu. Hulda er þjóðfræðingur að mennt og starfar nú sem bókavörður hjá Menntaskólanum á Egilsstöðum. Hún mun einkum sinna afgreiðslu og skráningu skjala í safninu. Hulda er ráðin til safnsins tímabundið vegna forfalla. 

Síðastliðinn laugardag var haldinn safna- og markaðsdagur í safnahúsinu. Þessi atburður var liður í yfirstandandi Ormsteiti sem virðist ætla að verða afar vel heppnað þetta árið. Svo var einnig með safna- og markaðsdaginn sem hófst kl. 11 fyrir hádegi og stóð fram eftir degi. Þrátt fyrir að margt væri um að vera í afþreyingu og skemmtun þennan dag bæði á Egilsstöðum, Seyðisfirði og víðar í nágrenninu komu á þriðja hundrað gestir í safnahúsið á laugardaginn.

Næstkomandi laugardag, 16. ágúst, verður Safna- og markaðsdagur Ormsteitis. Þann dag verður mikið um að vera í og við safnahúsið frá kl. 11 um morguninn og fram til kl. 16 síðdegis. Markaðstjald verður staðsett við safnahúsið og mun þar verða á boðstólum ýmis varningur. Sýningar minjasafnsins lifna við, keppt verður í kleinubakstri, harmonikkuspilari þenur nikkuna og geta þeir sem vilja æft gömlu dansana. Félagar í leikfélaginu Frú Normu verða á staðnum með Soffíu mús og vini hennar.

Þó netnotkun minnki jafnan yfir sumarmánuðina uppfærist heimasíða héraðsskjalasafnsins eftir sem áður.

Nú hafa bæst við fleiri tenglar í tenglasafnið og er nú vísað á yfir 50 vefsíður. Einnig hafa fundargerðir stjórnarfunda Héraðsskjalasafns Austfirðinga á yfirstandandi ári verið gerðar aðgengilegar hér á síðunni og eru þá allar fundargerðir síðustu þriggja ára komnar á vefinn, auk nokkurra eldri fundargerða. Ætlunin er að allar fundargerðir stjórnar- og aðalfunda safnsins verði í fyllingu tímans aðgengilegar á heimasíðunni. 

Ný myndasýning verður sett inn á síðuna í ágúst.

Aðfangalisti bókasafns Héraðsskjalasafns Austfirðinga, sem birtur var hér á síðunni 24. júní sl., hefur nú verið uppfærðuren hann má finna undir flokknum „Fróðleikur“ hér hægra megin á síðunni.
Við sem störfum í safnahúsinu leitum ávallt leiða til að þjóna gestum hússins eins vel og okkur er unnt. Eitt af því sem margir gestir, t.d. ferðamenn, fræða- og skólafólk, þarf á að halda er tenging við internetið. Því má tengjast eftir ýmsum leiðum í safnahúsinu.

Gestir safna eru miklivægir þátttakendur í að móta starfsemi þeirra. Til að skjalasafn þjóni hlutverki sínu sem skyldi þarf starfsfólk þess að leitast við að mæta kröfum og væntingum gestanna og greiða úr erindum þeirra eins vel og efni og aðstæður leyfa. Þetta verður að vera metnaðarmál starfsfólksins. En það þarf ekki aðeins að sinna safngestum og þekkja þarfir þeirra, það er líka mikilvægt fyrir hvert safn að hafa raunhæfa hugmynd um fjölda gesta.

Þrátt fyrir leiðinlegt veður hér eystra undanfarna daga hélt fólk hér sem annarsstaðar á landinu upp á Þjóðhátíðardaginn 17. júní. Hátíðahöldin drógu þó dálítið dám af veðrinu og voru þau flutt í hús sumsstaðar, þ.á m. hér á Egilsstöðum. Safnahúsið var að venju opið á Þjóðhátíðardaginn.

Ný ljósmyndasýning hefur verið sett inn á heimasíðuna og má skoða hana undir flipanum "Myndir" hér að ofan. Nýja sýningin kallastSumarsýning enda eru margar myndirnar í henni afar sumarlegar. Eins og áður eru myndirnar misgamlar og koma víða að, á einhverjum þeirra gefur að líta fólk eða staði sem ekki hafa verið borin kennsl á og eru upplýsingar um þær myndir vel þegnar.

Í héraðsskjalasafninu er varðveittur fjöldi örnefnaskráa er taka til bújarða eða annarra afmarkaðra svæða í Múlasýslum. Þessar skrár geyma flestar hverjar mikinn fróðleik sem varpar ljósi á náttúru viðkomandi svæðis, sögu þess og fleira er því tengist. Í pistli sem finna má hér undir flokknum Fróðleikur gefur Guðgeir Ingvarsson yfirlit um hvað til er í héraðsskjalasafninu af örnefnaskrám.

Héraðsskjalasafn Austfirðinga hefur opnað nýja heimasíðu. Hún leysir af hólmi eldri heimasíðu safnsins sem tekin var í notkun árið 2000 og var fyrir löngu orðin úrelt, bæði þung í vöfum og bauð upp á takmarkaða möguleika. Nýja heimasíðan er unnin af Austurneti ehf, þeim Tjörva Hrafnkelssyni, Þórunni Hálfdánardóttur og Unnari Erlingssyni, en þau unnu samhliða nýjar heimasíður fyrir héraðsskjalasafnið og fyrir Minjasafn Austurlands. Slóðin á nýja heimasíðu minjasafnsins er www.minjasafn.is og verður hún tilbúin á næstu dögum. 

Margt fólk lagði leið sína í Safnahúsið á sumardaginn fyrsta og tók þátt í sumarfagnaði safnanna þriggja sem þar eru til húsa. Minjasafnið var opið í tilefni dagsins og var gestum boðið upp á rjómavöfflur og kakó að þjóðlegum sið. Mæltist það afar vel fyrir og hafðist vart undan að framreiða veitingarnar.

Á fyrri hluta nítjándu aldar hófst landnám í Jökuldalsheiði. Heiðin liggur upp afnorðanverðum Jökuldal og afmarkast að norðan verðu af Þríhyrningsfjallgarði og Möðrudalsfjallgarði eystri. Að austan rennur hún saman við heiðalöndin inn af Vopnafirði.

landsbanki.jpg

Landsbanki Íslands hf. hefur veitt Héraðsskjalasafni Austfirðinga styrk að upphæð kr. 700.000,-. til skráningar á Ljósmyndasafni Vikublaðsins Austra. Þetta er í annað sinn sem Landsbankinn veitir styrk til þessa verkefnis.

Héraðsskjalasafn AustfirðingaLaufskógum 1, 700 Egilsstaðir

Sími: 471 1417
Tölvupóstur:   heraust@heraust.is

  Senda fyrirspurn

Héraðsskjalasafn Austfirðinga er byggðasamlag á vegum sveitarfélaga á Austurlandi. Safnið starfar samkvæmt lögum um opinber skjalasöfn frá árinu 2014 og er sjálfstæð skjalavörslustofnun en lítur faglegu eftirliti Þjóðskjalasafns Íslands. Megin hlutverk safnsins er að taka við skjölum og hafa eftirlit með skjalavörslu aðildarsveitarfélaga sinna og stofnana á þeirra vegum. Í safninu er ágæt aðstaða fyrir fræðiiðkanir. Öll söfnin í héraðsskjalasafninu - skjalasafnið, ljósmyndasafnið og bókasafnið - stækka ört og luma á margvíslegu efni sem nýst getur við fjölbreyttar rannsóknir, hvort sem þær eru unnar af fræðimönnum, nemum eða öðrum sem kjósa að nýta sér safnkostinn. Margs konar gögn eru í skjalasafninu, þar má t.d. leita upplýsinga um örnefni, landamerki eða um starfsemi félaga sem afhent hafa safninu skjöl sín.

© 2020 Héraðsskjalasafn Austfirðinga