Hér gefur að líta kort sem skreytt er mynd sem sýnir Reykjavík snemma á 20. öld. „Jólanissarnir“ á Austurvelli eru þó greinilega af skandínavískum uppruna og lítið í takt við íslenska stéttarbræður. Kortið er merkt upphafsstöfunum W.K.F. Útgáfuárs er ekki getið.

Hér er sami höfundur að verki (sjá kort 01). Teikningin á kortinu minnir óneitanlega á Almannagjá.

Ekki fer á milli mála á hvaða ári þessu korti var ætlað að flytja nýárskveðju. Upprunalands og útgáfuárs er ekki getið.

Klukka á slaginu tólf er táknræn á myndum á nýárskortum. Kortið er það eina á sýningunni sem gefið er út á Íslandi. Það er frá árinu 1926. Til gamans má geta þess að á frímerkinu er mynd af Kristjáni konungi tíunda og er verðgildi þess 8 aurar.

Hér er skálað fyrir nýju ári. Eins og oft vill verða þar sem vín er haft um hönd eru svínin ekki langt undan. Upprunalands og útgáfuárs er ekki getið.

Nýárskort frá 1926. Nýja árið hafið í góðum félagsskap. Upprunalands og útgáfuárs er ekki getið.

Hjarta og lykill í kaupbæti. Einstaklega rómantískt kort frá 3. áratug 20. aldar. Einkar heppileg aðferð fyrir feimið og fámálugt fólk að tjá hug sinn. Upprunalands og útgáfuárs er ekki getið.

Tvö á göngu í Alpalandslagi. Upprunalands og útgáfuárs er ekki getið.

Segðu það með tónum. Upprunalands og útgáfuárs er ekki getið.

Tvö á tali. Kortið er greinilega hluti af séríu. Upprunalands og útgáfuárs er ekki getið.

Kvöldsigling. Ástarguðinn Amor hefur greinilega laumast um borð og býr sig undir að spenna bogann. Upprunalands og útgáfuárs er ekki getið.

Kortið er framleitt í Þýskalandi. Það er dagsett 17. maí 1913. Stílað á „kæra frænda“. Sendandi er stúlka sem í kveðjunni á kortinu persónugerir parið á myndinni sem hana og viðtakandann.

Kortið er framleitt í Þýskalandi og sýnir söngvara í hlutverkum sínum sem Bissard og Juliette í óperettu Franz Lehár „Greifinn frá Lúxemborg“. Kortið er dagsett 2. janúar 1926 og hefur að geyma nýárskveðju.

Kortið er gefið út af Carl Schultze Theater í Hamborg. Dagsett 22. desember 1924. Það er áritað með eftirfarandi kveðju: „Óska að þú verðir jafn glaður og ánægður um jólin og nýárið eins og útlit er fyrir að þau séu skötuhjúin hinum megin á blaðinu. Svona getur sælan verið á háu stigi“.

Undir fjögur augu. Á kortinu er póststimpill frá 3. október 1907 og er verðgildi frímerkis 5 aurar. Upprunalands og útgáfuárs er ekki getið.

Öll lönd eiga sinn Rómeó og sína Júlíu. Kortið er framleitt í Þýskalandi. Útgáfuárs er ekki getið.

Hér er Júlía komin í annan kjól og Rómeó að yfirgefa meyjarskemmuna. Kortið er framleitt í Þýskalandi. Útgáfuárs er ekki getið.

Danskt kort, hluti af seríu frá 1911. Fangamark listamannsins er P.S. Aftan á kortinu er þetta erindi: „Natten er saa stille./ Luften er saa klar./ Duggens Perler trille./ Maanens straaler spille/ henad søen Glar.“

Danskt kort, hluti af seríu frá 1911. Á leið heim af engjunum. „Sig mig lille Karen, hvad mente du da?

Danskt kort, hluti af seríu frá 1911. Dönsk sveitarómantík. Hér gefur að líta Indriða og Sigríði frænda okkar Dana. Væntanlega við fjárgeymslu á jóskri heiði.

Danskt kort, hluti af seríu frá 1911. Þegar samskipti kynjanna eru annars vegar urðu á stundum lyktir þær að Storkurinn þurfti að grípa inn í. Aftan á kortinu er lítil vísa sem sögð er vera söngur barnanna um storkinn. „Stork, Stork Langben./ Hvor var du saa længe?/ Saa du Kong Faraos høje sten?/ Gik du paa Nilarstømmens Enge?.“

Rúningur í Skotlandi. Þetta er fyrsta mynd í seríu um skoskan ullariðnað. Kortin eru gerð eftir málverkum listakonunnar Jenny Richardson. Útgefandi er Scottish Tartans Museum. Útgáfuárs er ekki getið.

Ullin þvegin. Önnur mynd í seríu um skoskan ullariðnað. Uppruni kortsins er sá sami og korts 22.

Ullin kembd og spunnin. Þriðja mynd í seríu um skoskan ullariðnað. Uppruni kortsins er sami og kortanna á undan.

Jurtalitun undirbúin. Fjórða mynd í seríu um skoskan ullariðnað. Uppruni kortsins er sami og kortanna á undan.

Pottur er kominn á hlóðir og litun undirbúin. Fimmta mynd í seríu um skoskan ullariðnað. Uppruni kortsins er sami og kortanna á undan.

Vefarinn er sestur við vefstólinn og kominn vel á veg með að vefa stórköflóttan ullardúk í mörgum litum, efni sem við sjáum t.d. í þjóðbúningum Skota. Sjötta mynd í seríu um skoskan ullariðnað. Uppruni kortsins er sami og kortanna á undan.

Þá var komið að því að þæfa. Margir fætur vinna létt verk og ekki er verra að syngja við vinnuna. Sjöunda mynd í seríu um skoskan ullariðnað. Uppruni kortsins er sami og kortanna á undan.

Glæsilegir Hálendingar í þjóðbúningi. Efnin eru framleidd í mörgum litum og gerðum. Áttunda mynd í seríu um skoskan ullariðnað. Uppruni kortsins er sami og kortanna á undan.