Austfirskar fréttir
![](/templates/yootheme/cache/12/mynd%2001-2-12513e26.jpeg)
Nr. 1
TF-RTO á Egilsstaðaflugvelli 17. júní 1977. Við vélina standa flugmennirnir Kolbeinn Arason og Sigurður Björgvinsson. Austramynd (ljósmyndara ekki getið).
![](/templates/yootheme/cache/dc/mynd%2002-2-dce9f86c.jpeg)
Nr. 2
Flugfélag Austurlands fær nýja flugvél , Piper Chieftain. Við vélina standa (frá vinstri): Þorkell Þorkelsson flugvirki, Stefán Friðleifsson flugmaður, Gústaf Guðmundsson flugmaður, Steinar Steinarsson flugmaður, Jóhannes Fossdal þjálfunarflugmaður og Rúnar Pálsson umdæmisstjóri Flugfélags Íslands. Myndin birtist í Austra 25. september 1986. Ljósm: Örvar Þór Einarsson.
![](/templates/yootheme/cache/39/mynd%2003-2-39f3d876.jpeg)
Nr. 3
Unnið að gerð heyköggla að Stangarási í Vallahreppi. Við verkið var notuð færanleg heykögglaverksmiðja. Frá vinstri: Björn Hólm Björnsson, Guðmundur Hjálmarsson og Eysteinn Einarsson. Myndin er úr safni Kaupfélags Héraðsbúa.
![](/templates/yootheme/cache/85/mynd%2004%201-8584ed2a.jpeg)
Nr. 4
Austfirskar konur að koma heim af velheppnaðri kvennaráðstefnu í Turku í Finnlandi. Fulltrúar í bæjarstjórn Egilsstaðabæjar fagna þeim með rósum. Á myndinni eru (talið frá vinstri): Einar Rafn Haraldsson, Helgi Halldórsson, Elísabet Sveinsdóttir, Anna Ingólfsdóttir, Ágústa Þorkelsdóttir og Þuríður Backman (aðrir á myndinni eru óþekktir). Myndin birtist í Austra í ágúst 1994. Ljósm: Arndís Þorvaldsdóttir.
![](/templates/yootheme/cache/bd/mynd%2005%201-bdc14012.jpeg)
Nr. 5
Í júní 1988 var þessu sumarhúsi komið fyrir á grunni hjá ferðaþjónustunni á Skipalæk í Fellum. Myndina tók Sólveig Dagmar Bergsteinsdóttir fyrir vikublaðið Austra.
![](/templates/yootheme/cache/73/mynd%2006%201-73798658.jpeg)
Nr. 6
Á árabilinu 1976-1986 fóru fram endurbætur á kirkjunni á Klyppstað í Loðmundarfirði. Sumarið 1986 var boðað til messu sem var vel sótt af bæði lærðum og leikum. Í kirkjudyrum standa (frá vinstri) prestarnir Sverrir Haraldsson, Sigmar Torfason og Magnús Björnsson, en þeir tóku allir þátt í athöfninni. Myndina tók Inga Rósa Þórðardóttir, sem var á staðnum fyrir hönd Svæðisútvarps Austurlands.
![](/templates/yootheme/cache/db/mynd%2007%201-db8336f1.jpeg)
Nr. 7
Halldór Sigurðsson frá Miðhúsum var aðal hvatamaður þess að farið var í viðgerðir á kirkjunni á Klyppstað og vann mikið að þeim sjálfur. Hér er hann í ræðustóli í kirkjunni sumarið 1986 og lýsir endurbótum þeim sem gerðar voru. Myndasafn Svæðisútvarps Austurlands. Ljósmynd: Inga Rósa Þórðardóttir.
![](/templates/yootheme/cache/aa/mynd%2008%201-aade496f.jpeg)
Nr. 8
Handagangur í öskjunni í söltunarstöðinni Austursíld á Reyðarfirði haustið 1986. Myndina tók Örvar Þór Einarsson blaðamaður á Austra.
![](/templates/yootheme/cache/f4/mynd%2009%201-f4562727.jpeg)
Nr. 9
Landað úr Snæfuglinum á Eskifirði í september 1988. Myndina tók Guðrún Benediktsdóttir blaðamaður Austra.
![](/templates/yootheme/cache/06/mynd%2010-2-06b67320.jpeg)
Nr. 10
Blaðamenn vikublaðsins Austra lögðu sig fram um að birta fréttir frá síldveiðum og síldarlöndunum á Austurlandi og brugðu sér öðru hvoru á vettvang. Hér er verið að skipa síldartunnum upp í Eskifjarðarhöfn haustið 1990. Austramynd. Ljósm: Sólveig Dagmar Bergsteinsdóttir.
![](/templates/yootheme/cache/04/mynd%2011-2-04147e3d.jpeg)
Nr. 11
Myndin hér að ofan er elsta myndin á sýningunni, en hún prýddi forsíðu Austra þann 24. október 1985. Þarna gefur að líta Jón Sigurðsson bónda á Sólbakka á Borgarfirði og Sigurgeir Þorgeirsson, sauðfjárræktarráðunaut hjá Búnaðarfélagi Íslands á hrútasýningu í Brandsbalarétt á Borgarfirði. Með þeim á myndinni eru feðgarnir Þistilkóngur og Lambi sem unnu til fyrstu og annarra verðlauna. Um Þistilkóng, sem vóg 119 kg, sagði Sigurgeir að hann væri djásn að allri gerð og á meðal bestu hrúta sem hann hafði skoðað það haustið. Þess má geta að tveim árum síðan var Þistilkóngi slátrað vegna niðurskurðar. Austramynd. Ljósm: Björn Aðalsteinsson.
![](/templates/yootheme/cache/89/mynd%2012%201-89855fdd.jpeg)
Nr. 12
Í nóvember 1986 birtist í Austra viðtal við Karl Jóhannsson, loðdýrabónda á Þrándarstöðum í Eiðaþinghá. Myndina tók Örvar Þór Einarsson af Karli við það tækifæri.
![](/templates/yootheme/cache/f5/mynd%2013%201-f5962e7d.jpeg)
Nr. 13
Myndina hér að ofan tók Björn Aðalsteinsson myndatökumaður Austra á Borgarfirði eystra. Sýnir hún liðsmenn í björgunarsveitinni Sveinunga á björgunaræfingu í mars 1988.
![](/templates/yootheme/cache/ec/mynd%2014-2-ec05a02b.jpeg)
Nr. 14
Sigfús Árnason slökkviliðsstjóri Brunavarna á Héraði. Vorið 1988 birtist viðtal við Sigfús í Austra. Þar var það Sigrún Björgvinsdóttir sem rakti garnirnar úr slökkviliðsstjóranum en einnig hún er á bak við myndavélina.
![](/templates/yootheme/cache/28/mynd%2015-1-281e6d54.jpeg)
Nr. 15
Guðlaug Sigurðardóttir frá Útnyrðingsstöðum tekur fyrstu skóflustunguna að gróðurhúsi Barra hf. haustið 1990. Aðrir á myndinni eru (frá vinstri): Einar Gunnarsson, Sveinn Jónsson, Jónas Magnússon og Jörundur Ragnarsson. Austramynd (ljósmyndari óþekktur).
![](/templates/yootheme/cache/93/mynd%2016%201-934e18a2.jpeg)
Nr. 16
Trjáplöntur vökvaðar í gróðurhúsi Barra haustið 1993. Það er Þórhallur Sigurðsson sem stýrir kerfinu. Austramynd. Ljósm: Arndís Þorvaldsdóttir.
![](/templates/yootheme/cache/08/mynd%2017%201-08e54405.jpeg)
Nr. 17
Þorleifur Guðjónsson og María Rós Valgeirsdóttir, nýir eigendur Hótels Öskju á Eskifirði, kynnt í Austra vorið 1997. Myndina tók Arndís Þorvaldsdóttir.
![](/templates/yootheme/cache/e8/mynd%2018-2-e87257ad.jpeg)
Nr. 18
Seinni part vetrar árið 1997 sagði Austri frá grisjun í Geitagerðisskógi þar sem unnir voru girðingastaurar. Myndin sýnir Hákon Aðalsteinsson skáld og skógarbónda við störf. Austramynd (ljósmyndara er ekki getið).
![](/templates/yootheme/cache/7d/mynd%2019-2-7d028338.jpeg)
Nr. 19
Myndin er tekin í Atlavík og sýnir opnun báta- og hestaleigu vorið 1996. Í forgrunni er Jóna Björt Friðriksdóttir, en aðrir á myndinni eru óþekktir. Austramynd. Ljósm: Sigurður Björn Blöndal.
![](/templates/yootheme/cache/5c/mynd%2020-2-5cd74c40.jpeg)
Nr. 20
Haustið 1991 sagði Austri frá miklum uppgangi hjá umboði Toyota bíla á Egilsstöðum. Myndin sýnir Sigurð Elís Rögnvaldsson afhenda Hreini Pálssyni og Öldu Pétursdóttur frá Reyðarfirði fjögurhundraðasta bílinn. Austramynd (ljósmyndara er ekki getið).
![](/templates/yootheme/cache/c0/mynd%2021%201-c0032bd5.jpeg)
Nr. 21
Starfsmenn Svæðisútvarps Austurlands, Hjalti Stefánsson myndatökumaður og Jóhann Hauksson fréttamaður, í fréttaleiðangri inn á Eyjabökkum. Viðmælandinn er listakonan Rúrí. Myndin er úr myndasafni Svæðisútvarps Austurlands.
![](/templates/yootheme/cache/aa/mynd%2022-2-aa2a2732.jpeg)
Nr. 22
Starfsmenn Svæðisútvarpsins, Hjalti Stefánsson myndatökumaður og Björn Malmquist fréttamaður, taka púlsinn á Neistaflugi í Neskaupstað. Myndin er úr myndasafni Svæðisútvarps Austurlands.
![](/templates/yootheme/cache/14/mynd%2023-2-1477a064.jpeg)
Nr. 23
Myndin sýnir Gunnar Hjaltason og Höllu Einarsdóttur við útsaumssaumavél til sérmerkinga á fatnaði. Fréttin birtist í Austra haustið 1997. Ljósm: Sigurður Björn Blöndal.
![](/templates/yootheme/cache/d8/mynd%2024-2-d8789e9c.jpeg)
Nr. 24
Snorri Styrkársson kynnir nýja framleiðslu Mjólkursamlagsins í Neskaupstað. Um var að ræða nokkrar bragðtegundir af súrmjólk og vöffludeig. Myndin birtist í Austra í nóvember 1996. Ljósm: Sigurður Björn Blöndal.
![](/templates/yootheme/cache/66/mynd%2025-2-662519ca.jpeg)
Nr. 25
Lagning ljósleiðara í götuna Laufás á Egilsstöðum haustið 1996. Símamennirnir Elíeser Helgason og Guðmundur Þorleifsson ræða við Vilhjálm Emilsson, íbúa í götunni. Austramynd. Ljósm: Marinó Marinósson.
![](/templates/yootheme/cache/57/mynd%2026-2-57594d4a.jpeg)
Nr. 26
Í júní 1997 sagði Austri frá því að Verkfræðistofan Hönnun og ráðgjöf hefði tekið í notkun GPS mælitæki til landmælinga. Myndin sýnir þá Bergstein Metúsalemsson og Björn Sveinsson við störf. Austramynd. Ljósm: Sigurður Björn Blöndal.
![](/templates/yootheme/cache/70/mynd%2027-2-700d9ba6.jpeg)
Nr. 27
Þann 12. júni 1997 var vígt nýtt tollhús á Seyðisfirði. Myndin, sem tekin var við það tækifæri, sýnir Magnús Skúlason arkitekt, séra Kristínu Pálsdóttur og Sigurbjörgu Flosadóttur ferðamálafrömuð, um borð í Norrænu. Austramynd. Ljósm: Sigurður Björn Blöndal.
![](/templates/yootheme/cache/b2/mynd%2028-2-b21368cd.jpeg)
Nr. 28
Í júni 1997 var frétt í Austra um hestaferðir. Myndin sýnir Stefán Sveinsson á Útnyrðingsstöðum á Völlum sem áð hefur í Útmannasveit og tekið tali Geirmund bónda á Sandbrekku. Austramynd. Ljósm: Sigurður Björn Blöndal.
![](/templates/yootheme/cache/e2/mynd%2029-2-e2408eb7.jpeg)
Nr. 29
Þann 27. júlí 1994 var 70 fermetra sólpallur við Hótel Valaskjálf á Egilsstöðum opnaður formlega og var sagt frá opnunni í Austra. Myndin sýnir Sigurð Ananíasson, Hörpu Einarsdóttur og Svein Sigbjarnarson njóta veitinga í sumarblíðu. Myndina tók Arndís Þorvaldsdóttir.