Austfirsk menning í ljósmyndum

Við úthlutun styrkja Menningarráðs Austurlands fyrr á þessu ári fékk Héraðsskjalasafn Austfirðinga fjárstyrk til verkefnisins Austfirsk menning í ljósmyndum. Markmið verkefnisins er að fara með sérsniðnar ljósmyndasýningar til byggðarlaga á starfssvæði safnsins. Nú er komið að Breiðdal og Stöðvarfirði. Miðvikudagskvöldið 3. október verður sýning í Kaupfjelaginu á Breiðdalsvík og hefst hún kl. 20:00.

Aðalefni sýningarinnar eru ljósmyndir (í powerpoint-fromi sem varpað verður á tjald) frá Breiðdal og Stöðvarfirði og af fólki þaðan. Auk þess verður á dagskránni stutt kynning á starfsemi Héraðsskjalasafnsins og sýning myndskeiðum úr safni Austfirska sjónvarpsfélagsins og útibús Stöðvar 2 á Austurlandi. Þau myndskeið eru frá 9. og 10. áratug síðustu aldar og gefa áhugavert þversnið af atvinnu- og mannlífi á Austurlandi á þeim tíma. Myndefnið sem sýnt verður – bæði ljósmyndir og lifandi myndir – kemur úr safnkosti Héraðsskjalasafnsins og Ljósmyndasafns Austurlands. Dagskráin verður u.þ.b. ein klukkustund að lengd og munu undirritaður og Arndís Þorvaldsdóttir hafa umsjón með henni.

Ég hvet Breiðdælinga og Stöðfirðinga til að fjölmenna á sýninguna. 
Aðgangur er ókeypis.

Hrafnkell Lárusson
forstöðumaður Héraðsskjalasafns Austfirðinga